Kann Miðflokkurin snáva um tinggáttina?

Jenis av Rana hevur sitið á Tingi síðani 1994. Mynd: Wikimedia Commons
Miðflokkurin hevur verið fast inventar á Tinghúsvegi 1 síðani flokkurin á fyrsta sinni kom á Ting í 1994 - í ringastu krepputíðum. Flokkurin var tá eitt slag av mótmælisflokki: ein kristiligur flokkur við einum sosialum profili - eitt slag av kristnum sosialdemokratii. Upp gjøgnum 90’ini vóru bæði Miðflokkurin og Kristiligi Fólkaflokkurin umboðaðir á Løgtingi, men Kristiligi Fólkaflokkurin minkaði javnt og samt, til at partar av flokkinum fóru upp í aftur Fólkaflokkin, haðani hann upprunaliga spratt - tá undir navninum Framburðsflokkurin. Seinastu árini hevði hann hábærisliga navnið Kristiligi Fólkaflokkurin, Føroya Framburðs- og Fiskivinnuflokkur ella KrFFFF. Flokkurin snávaði í 1998 og stillaði ikki uppaftur - tó at hann hevði ein býráðslim í Klaksvíkar kommunu fram til 2004.


Miðflokkurin hevur í síni livitíð svingað frá 4,1% av atkvøðunum í 1998 upp í 8,5% av atkvøðunum í 2008. Í 2008 hepnaðist honum at fáa heilar tríggjar tinglimir, men hetta var tí at Karsten Hansen júst var rýmdur úr Tjóðveldi og fekk eitt kanónval á miðflokslistanum. Hetta var eisini fyrsta árið, løgtingsval var uttan valdømi, so Karsten støvsúgvaði atkvøður úr øllum landinum. Seinastu árini hevur flokkurin havt rættiliga trygga umboðan og hevur fingið tveir tinglimir. 


Eitt serligt við Miðflokkinum er, at formaðurin Jenis av Rana øll árini hevur umboðað flokkin. Í nógv ár hevur hitt umboð floksins itið Bill Justinussen, men eftir at hann snávaði á valinum í 2022, hevur hann skift yvir til Fólkaflokkin. Nýggi “sekundanturin” hjá Jenisi av Rana er nú Steffan Klein Poulsen. Eisini roynir Miðflokkurin nú at promovera kvinnulig valevni sum Rósu Tyril Gaardlykke og Jórun Pólsdóttir. Flokkurin roynir at sleppa undan sínum image sum patriarkalskur flokkur, ivaleyst eisini fyri at tekkjast kvinnuligum veljarum.


Men tað sær einki út í løtuni. Á seinasta løgtingsvali fekk flokkurin 6,6% av atkvøðunum, í veljarakanning fyrr í heyst var hann tódnaður niður í 5,2%, og í seinastu veljarakanning var úrtøkan einans 4,4%. Verður ein linjurøtt tendenslinja løgd yvir hesi tøl, endar Miðflokkurin stutt omanfyri 3,1% í komandi veljarakanning og heldur gongdin fram, snávar flokkurin um tinggáttina á valinum komandi ár. 


Nú máli eg sjálvandi fanan á veggin, tí so galið nýtist ikki at ganga. Men ávaringarlampurnar munnu blunka, tí gongdin er blóðskeiv hjá hesum lítla og skirvisliga flokki. Kanska hevur Bill Justinussen tikið nógvar veljarar við sær? Saman við yvirskipaða viðrákinum hjá Fólkaflokkinum er Miðflokkurin í vanda fyri at verða støvsúgvaður fyri høgravendar kristiligar atkvøður. Annars verður Miðflokkurin roknaður sum ein trupul samstarvsflokkur, m.a. tí at hann ikki hevur eina felags linju í málinum um boykot av russiskum skipum. Veljarar í Norðuroyggjum og Eysturoynni kunnu tá hugsast at velja trygga valið: Fólkaflokkin.  


Men kanska kunnu onkrar kaninir hálast upp úr hattinum - ella úr onkrari holu. Fyrrverandi sambandsvalevnini Edva Jacobsen og Aron Vest eru “uttan felag”, og kanska kunnu tey lokkast til at stilla upp fyri Miðflokkin? Ivist ikki í, at Miðflokkurin er aktivur á transfermarknaðinum, nú nærkast vali. Men staðfestast má, at niðurflytingarstrikan er hóttandi nær, og verður einki munagott gjørt, fær Miðflokkurin líknandi lagnu sum Sjálvstýrisflokkurin fekk á seinasta vali - og sum KrFFFF fekk í 1998. KrFFFF minkaði tá úr 6,2% niður í 2,5%, so tað er als ikki ógjørligt at missa meiri enn helvtina av undirtøkuni, um illa vil til.


p.s. eftir at eg skrivaði hendan bloggin, er Sámal Hanni Lognberg farin úr Sambandsflokkinum upp í Miðflokkin. Tað er ein ordans kanin.

 

Comments

Post a Comment

Popular posts from this blog

Løgtingsmaðurin, ið ikki tímdi meiri

Image
Vit vóru vitni til eina sera løgna hending í farnu viku. Sólvit Nolsø, ið í vár fór frá sum formaður í tingbólkinum hjá Framsókn, tí at fortreytirnar í Framsókn vóru broyttar, síðan hann stillaði upp seinast, gjørdi nú ikki mætari enn at taka seg úr Løgtinginum, soleiðis at sættvaldi á framsóknarlistanum - Árni Dam -  nú kemur á ting fyri hann. Sólvit gjørdist triður á listanum við 249 atkvøðum, men Árni fekk einans 102 atkvøður. Ítøkiliga orsøkin er, at Sólvit í næstum byrjar sum kommunustjóri í Vestmanna kommunu - blíðan byrð við tí, Sólvit! Men við Kringvarpið sigur hann harumframt, at: “Ymiskt er hent seinastu árini, sum hevur broytt mína meining um, at politikkur skuldi verða mín yrkisleið.” Tað er ein týðiliga vónsvikin maður, ið nú smekkar við tinghurðini, men sigast má eisini, at hann hevur havt eina løgna politiska karrieru. Hann byrjaði sum skrivari hjá Fólkaflokkinum, men gjørdist í 2022 landsstýrismaður í Almannamálum fyri sama flokk. Hóast hetta vendi hann flokkinum r...
Read more

Tjóðveldi í samleikakreppu av Russlandspolitikkinum

Image
Tjóðveldi hevur sum flokkur ilt í samleikanum. Undantikið sjálvt fullveldisstríðið, hevur hesin flokkur meiningar í allar ættir. Eitt aktuelt dømi er russlandspolitikkurin, har flokkurin er tvíbýttur.  Í vikuni skrivað Sigrid J. Dalsgaard, forkvinna í Eysturoyar Tjóðveldisfelagi og limur í aðalstjórn floksins, lesarabræv, har hon segði, at “Um vit velja at enda eitt samstarv ella um vit velja at gera fleiri revsitiltøk, skal tað vera tí at vit meta, at tað er rætt fyri okkara tjóð.” Hon raðfestir føroyskt sjálvsøkni fram um samhuga við Ukraina. Hon óttast at vit meiri enn at revsa russar revsa okkum sjálvi við at liva upp til høgu idealini hjá “moralsku reiðmonnunum”, ið tala til ringu samvitskuna hjá føroyingum.  Sigrid staðfestir víðari, at um vit kuta sambandið við Russland, er ikki víst at vit fáa nakran annan ágóða afturfyri: “So kaldur og kyniskur sum handils- og uttanríkispolitikkur er, so skulu vit ikki halda, at grannar okkara taka um endan og kompensera fyri missin....
Read more

ALS er partur av samlaða skattatrýstinum

Image
Mynd: Freepik “Landsstýrið skal halda fingrarnar langt burturi frá Arbeiðsloysisskipanini. Tað er enntá ásett í lógini fyri ALS.” Soleiðis verður formaðurin í stýrinum fyri ALS, Alfred Petersen endurgivin. Hann hevur biðið landsstýrið um at strika ALS av uppskotinum til fíggjarlógarlóg fyri næsta ár. Tað stendur svart upp á hvítt í §2A í ALS-lógini, at "inntøkur og útreiðslur grunsins verða ikki tiknar við á løgtingsfíggjarlógina" . Fakfelagssamstarvið hevur síðani verið úti og stuðlað stýrisformanninum. ALS verður mangan umtalað sum nakað heilt serligt, sum ein sólskinssøga um at ein vælferðarskipan kann skipast við armslongdar-frástøðu frá løgtingi og landsstýri. Máliskan “halda fingrarnar frá” er annar ikki nýggj í ALS-høpi. Heilt afturi í 1999 var hendan yvirskrift at síggja: “Fakfeløg ávara: “Fingrarnar vekk frá milliónunum hjá ALS”.   Og í 2006 var aftur galið. Tá hevði Løgtingið ítøkiligar ætlanir um at taka ALS frá pørtunum á arbeiðsmarknaðinum. ALS hevur mesta part...
Read more